HRINGNUN PHEK LEHLAM
Zan boruak thiang nuam tak leh vawt vuk mai chu ka meizial pak khuk luih luih pah chuan ka thlir vel a, hun liam tawh a ka hmangaih ka tana parvul ta lo chu ka ngaihtuah lai chuan ka phone torch light support ka hman rim tak chu a rawn ri vawl vawl a, zanlai pelh tawh lamah ka phone a’n ri chu peih lo takin ka’n en chuan kan thawhpui senior tawh tak a hming pawha kan koh ngam loh Pu Si-a a ni reng mai. Hetiang hunah ani’n min han call tak mai chu mak ka ti hle a, mahse a pawimawh ka rin em a vang chuan ka pick up ta vat a.
Keimah – Aw, Hello Pu Si eng nge ni ta? tun ang zan rei tawhah min rawn call tak?
Pu Si-a – I la mu lo maw? Office lamah i rawn tlan phei hman ang em? Thil mak lutuk a thleng tlat mai.
Keimah – A va hmanhmawh thlak awm ve maw le? Mut ka lo tum tawh asin! Midang an awm lo em ni?
Pu Si-a – Aw, Pu-in nangmah kher a ti che a.
Keimah – (Ner nung chung chuan) Aw le, ka rawn kal nghal ang.
Zan rei tawh lamah ka duty zan pawh ni si lo, pu berin min ko tlat mai chu eng nge a chhan ni ang le ti a ngaihtuah pah chuan peih lo takin ka in siam a. Ka bike, \awng lam tawh, chu ka’n rap nung vang vang a, office lam pan chuan khaw vawt tak hnuaiah chuan ka tlan nghal a. Kawngah chuan zanlai a chaw zawng nula leh tlangval inbe mawlh mawlh hmuh tur an awm nual mai. Kan Zoram boruak hi chu aw tia ngaihtuah reuh reuh pah chuan ka tlan ta zel a. A neite chuan RCC Building luah sen loh an sa lurh a, kei ang a michhe daikilkara mite erawh veng mawng lamah in \awl tawh lam neih thinlung khawngin kan luah a ni si a aw kan va in ang lo teh lul em!
Kan sawi thui hmain ka chanchin tlem ka’n hrilh hmasa ang che u. Ka hming chu Lalrodinga a ni a. Tunah hian sawipuitu neih \hat vang ni lo leh Minister lehkha ka neih vang ni hauh loin Inspector hna ka thawk mek a. Tlangval hnahkhat ngat ka la ni. Duhzawng chu ka ngah mai mah se min duhtu erawh an vang pharh thung. Zu lem ve zeuh ka chin leh meizial ka zuk bak thil dang eng em em tih ka nei lo. (Tz)
Aw le, kan thawnthu sawi mekah lut leh tawh ang. Office ka thlen phei hnu chuan kan pu chuan a office-ah min ko lut nghal a. Min koh chhan chu min hrilh \an nghal a. Nizan, tukin a ni tawh zawk mah ang chu, dar 12:40 vel khan Kawlkulh leh Ngopa inkarah tualthahna rapthlak tak a thleng a, va en thlithlai turin ka duh che a ni. An sawi dan chuan mihring tih a ang lo, sapui tih a nih an ring, mahse chulai hmun velah sapui an hmuh lohna chu \hangkhat lian zet a ni tawh si. A rang thei ang berin kal nghal turin ka duh che a ni a han ti a. Kei aia Senior awm mah se hetiang deuh Case ka lo buaipui tawh avang chuan kei kher min tlang hi a lo ni a, lawmawm viau mah se ka chak lo rilru hle a, mahse ka sawi lang ta lem chuang lo. Case lian tham leh mipui bengkhawn zawng a nih avangin a hma thei ang bera chhui chhuak tura min duh thu a sawi zawh hnu chuan ka chhuak a, rilru kawm melh melh pah chuan in lam chu ka pan leh ta a. Kawnga ka kal lai chuan nupa inhau ri te, darthlalang tla keh ri chuai chuaite chu hre mah ila kan Zoram boruakin a ken tel a nih hi tiin benkhawn vak loin ka kalsan mai a. In ka thlen chuan mut mai ka tum a, mahse mut a chhuak thei thawt lo, ka lo mangnghilh tawh leh hunin a liampui tak, ka hmangaih ti a ka auh te khuaah kal a ngai hi ka phurna leh huphurhna a inzat vel awm e.
Ka mut a chhuah hlawl loh avangin hun liam hnu ngaihtuah reuh reuh pahin ka thawmhnaw ka siam fel zung zung a. Sawi tak ang khan mipui rilru a tihchi-ai nasat avangin chhui chhauh thuai thuai ka duhna chuan min tih hmanhmawh avangin zingah chaw pawh ei loin Ngopa chu ka pan nghal a. Kawngah ka tluang lo em em mai lehnghal a, ka thinrim chu kan pu thlate chu ka hau thul. Ka lo aw ta kher kher kha ka inchhir hle, mahse mipain thu ka tih tluk tawh avangin hlawhchham a kir erawh ka tum hauh lo. Tlai dar 3 velah Ngopa ka thleng a, hah viau mah ila Ngopa Police Outpost ka pan ding nghal a; buaipui ngai leh \ul hmasa ni a ka hriatte ka zawt a, ka ti nghal zung zung a, he tualthahna chungchanga report chi hrang hrangte ka en kual zung zung a, mit han la bik bul han \anna tur a vang hle. Report a\ang chuan engmah ka chhui chhuak dawn lo tih ka hriat avang chuan rilru buai takin ka thlenna chu ka pan ta zawk a. Hmalak dan turte ka ngaihtuah fel hnu chuan ka khumah chuan nunhlui ngaihtuah pahin ka mu zal mai mai a ka muhil ta a. (Tz)
Zing dar 2 velah chuan mak tak maiin ka \hangharh hlawl mai a, sihal u ri leh ui bauh ri chuan ka beng an verh hle. Tunlaiah Sihal han u ta mai chu mak ka ti rilru hle a, mut leh mai ka tum a mahse ka harh tulh tulh mai si a, muhil ta lo chuan ka tho chhuak ta zawk a. Tuk \huan kan ei lai chuan ka thlenna pa Pu Mawia chu an khuaa thil thleng chanchin chu ka zawt vel a, ka hriat hnu bak han sawi belh tur a hre vak lo. Chaw kan eikham hnu chuan tualthahna hmunah chuan ka kal a, mitthi ruang chu awm tawh lo mah se thisen a chhuak hnem tih hriat takin alo la pherh nuaih a, ruah a sur avangin a sen kawi zuk mai, a thang huam huam bawk si. A bul vel ka’n en chiang a, tualthattu hnu han hmuh tur a awm hauh lo, kan lut ril zel a, ka beisei ang ngeiin Sa hnu chu a awm \euh mai, mahse mak tak maiin Sakei hnu chu a ni theiin ka hre lo a ni. Kan chhui thui zel a, Kawng peng \huamah hian Sa hnu chu tawpin mihring ke hniakin a zuita tlat mai. Mak ka tih em avang chuan kan chhui zui leh a, mahse a hnu chu chhuih theih lohin metal kawngah chuan a tawp a. Ka lu thak lo pui hiah nuap nuap pah chuan ka thlenna in chu ka pan leh ta daih a.
Han chhui zui ngaihna vak a awm loh avang chuan mi vengva deuh han kawm kual a, an khaw pasal\hate han biak ka duh avang chuan ka tei chhuak a, Ngopa khaw VCP inah chuan ka lut a, Pu Rina nen chuan kan han titi luam a, ngaihna a hriat bik loh thu leh an khaw pasal\hate pawhin mak an tih thu bak sawi zui tur a hre vak lo. An khuaah Sapui a luh lohna chu \hangkhat lian zet a ni tawh si a, khaw mi te pawh an ral\i hle nghe nghe a ni. Nizan a Sihal u ri ka hriatte chu ka’n sawi chhuak a, a hmain an hriat ngai leh ngai loh kan zawt chhunzawm nghal bawk a. Pu Rina chuan thlakhat liam ta vel a\ang khan an hriat \an thu leh mak an tih thu chu a sawi chhuak a. An khaw pasal\hate nen an han chan pawh hian an chang a ni tih a hriat ni ngei tur a ni, a reh hmak zel a! an chan loh zanah erawh a u ri hi an hriat fo thu a sawi tel nghal a. Ka Sa hnu hmuh nen inzawmna a neih ka rin avang chuan hemiah hian rilru sawr bing ka tum rilru ta a. Kan titi melh melh lai chuan kawngka hi an rawn kik det det a, Pu Rina chuan lo chhawn vatin, ka beisei hauh lohin he khua a kal ka hrehna chhan chu a rawn pen lut zal zal mai a, mit tla lek loin ka lo en vung vung a, ani paw’n mak a ti ve tho a ni ang, phawk fe hian min melh a. Choka lamah chuan a phei ta daih a. Pasal alo la nei lo nge he khua a mi pasal a nei zawk le tiin ka ngaihtuah neuh neuh a, la nei lo se ka ti hle. Kan titi kan chhunzawm a, ka hriat chak lam a nih tawh loh avangin Jenny-i chanchin chu Pu Rina ka zawt ta zawk a. Pasal a neih tawh leh neih loh ka’n zawt ngawt mai chu Pu Rina chuan mak a ti hle. Aizawl-ah kan inkawm \hin thu ka sawi hnuah erawh a mak tihna a reh a, a chanchin chu min hrilh ta zawk a. Pasal ala neih loh thu leh phaiah kum rei tak a awm hnuah thla hmasa khan a rawn haw chauh thu chu a sawi chhunzawm nghal a. Nula fel tak a nih thu chu a belh bawk a. Han sawi belh vak tur a awm loh avang chuan hna chhuanlam siamin haw zai ka rel ta a. Haw kawngah chuan Jenny-i chu ka rilruah a awm reng a, remchang hmasa berah len ka tum ruh hle. Police Outpost-ah a \ul \ul tiin hun ka hmang nileng a, tlai dar 4-ah chuan ka haw a. (Tz)
Zan a ni a, ka thil hriatte chu kan hmehbel vel a, a titu diktak a ni tih fiahna la awm lo mah se Sihal emaw ramsa eng emaw ber chu a ni ngei dawn e tiin mut zai ka rel a. Ni hnih a liam a, hmasawnna a awm lo hle, kan puin min rawn tur chhen bawk nen chhui chhuah vat vat chu ka chak hle a. Jenny-i nen pawh kan inbe nasa tawh hle. Hmangaih pawm lai nei a nih loh avang chuan hmangaih biahthu pawh kan inhlan thlum leh tawh hle bawk.
Thla bial zan a ni a, Sihal u ri chuan ka beng a verh leh tawh hle mai. Eng sa pawh chu lo ni se eng nge a nih fiah tumin a u ri ka hriatna lam chu ka pan a, ka pan lai mek chuan Information mike-ah an khaw mi naupang a feh a hawn loh thu leh zawn a ngaih thu an rawn puang a, eng emaw thleng tura rinna ka neih tlat avang chuan ka phur hle a. U ri ka hriatna lam chu ka pan zel a, chutah le Sihal aia lian si, Sakei tih dawn a ni bawk si lo hian naupang ruang chu lo din chilhin alo ei mial mial mai a, ka hmuh rual rual chuan ka silai chu ka hmet puak dawt a, a malpuiah ka kap fuh a, a rawn hawi let zawk a min hmuh rual rual chuan a tlan bo ta daih a, um zui ka tum deuh a, mahse a kal hlat ka rin loh avang chuan naupang chu ka va bawihsawm a, chhan hman erawh a ni tawh lo. Ka silai puak ri hriain tlangval ho pawh an lo thleng ve nghal a, ka hmuh dan leh chanchin vel chu ka hrilh thuak thuak a, ka sa kah erawh eng nge a nih ka zep tlat thung, hlang siamin an zawn haw a, kei erawh ka thil kah kha chhui zui ka chak deuh avangin ka kal hrang ta vat a. Ka chhui zui zel a, mak deuh mai chu mihring hniakin Sa hniak kha a in chhunzawm leh ta tlat mai. Chhui zui zel ai chuan khaw lamah ka mi chhui hi hmuh ka inrin avang chuan ka haw ta daih a.
In ka thlen chuan ka phone ka en nghal a, message hi a lo awm nual a, \hiante fiamthu leh news lam thil a awm \euh a, ka duati message pawh a lo awm ngei a, khawhar ina kal puiah ka sawm a, mahse a va hrilhhai thlak em! Tlaia a inbual tur a ke a tih nat thu a sawi ta tlat mai. Chutia bialnu ber a nat takah chuan khawtual mi ka ni lo bawk nen leng turin ka chhuak ta daih a. In ka thlen chuan a lo tuam bur a, a tluk dan vel a sawi chuan pawi ka tih thu ka sawi luam a, ka malis-sak pah bawk a. Engtin emaw a hawi zawng hian ka thil kah nen khan inanna an hmelah ka hmu leh tlat \hin a, mahse ka ngaihbel niah ngaiin ka ngaihtuah lo lui a. Thil danglam dang thleng tawh em em lo chuan kan inmang\ha a, ka haw ta a, ka haw dawn chuan a tlukna ni a a sawi chu ka va en hram a, tluk nat viauna tur hmun a niin ka hre lo, mahse a sawi miau si a, awih chiah lo deuhin ka haw ta a. Thil thleng thei chi hrang hrang ka ngaihtuah a, ka Duati chu ring ngam chiah loin ka ringhlelh lo thei si lo. Tichuan ka Duati chu ka chhui bing zual ta a, ka chhui tih a hria nge ni dawn rinhlelh tur hian a awm duh miah lo a. Pute turna nen ka rilru a hmanhmawh tawh hle a. Thlakhat a liam ta der mai, hmasawnna a awm bawk si lo kan pute chuan bansan a Sapui thil tihah puh thluk mai \ha an ti a, mahse kei erawh chuan hun tlem min pe belh ula ka chhui chhuak em em ang ka ti \alh a. Tichuan le, thla bial zan chu a rawn her chhuak leh ta a, ka Duati te in chu a lan chian theihna ber tur a\ang chuan ka thlir reng a, ka Duati chu pawnah rawn chhuakin a thim lai deuhah kalin a thawmhnaw a phel vek a, eng nge maw a tih dawn le ti a ka thlir reng lai chuan a va mak em! Ramsa-ah chuan a chang a, u ruah ruah chung chuan ram lam panin a tlan liam ta nghal a, a chet vel dan zawng zawng hi Camera in ka lo cover vek bawk a. Ka mi duh ka hmuh tawh avang chuan a rawn haw hun nghakin inah ka lo awm a, dar 1 velah hian a hmai a thisen kai deuh nuai hian a rawn lut a, min hmu chu mak a ti hle. Eng sawi set set lo chuan ka lo man bet nghal a, tlan chhuah pawh a tum chuang lo thutthlengah chuan ka \huttir a, tichuan a chanchin chu ka zawt chiang ta a, engtiang a hetiang a awm nge a nih tihte ka zawt a. A awm dan zawng zawng engkim ka hmuh thu leh zep lo a engkim min hrilh tur chuan thu pe aw takin ka hrilh a. A chanchin chu tihian min hrilh ta a. (Tz)
Khatia phaia ka kal khan hna ka hmuh theih ang ang ka thawk kual a, ka zir san loh avangin hna ka hmu lawk thei si lo a. Ka rilru a mangang em em mai a, chutia mangang taka ka awm lai chuan Factory pakhatah hian hna ka hmu ve ta nawlh a, mahse ka hna hmuh chu thawh a ngai lo a, hlawh chu \ha tak a ni, ka thisen leh chi hi an la a thla khat hnuah kal leh tur chuan min ti a, ka va kal leh chuan thil eng emaw hian min jection a, tichuan min hawtir leh ringawt a. Sum chu a tam khawp mai, hah miah loin sum ka la lut a nuam pawh ka ti hle, mahse khaw lo taka khawsa erawh ka ni lo. Tichuan, thla bial zan hian min hmuh ang khan ka chang a, a bak ka hriat leh chu khumah ka lo mu leh diam tawh a ni. Tichuan ka hna hmuhnaah chuan ka va kal nghal a, ka chanchinte ka hrilh hnu chuan Sawrkar-in a ruk a mihring laka experiment an neih a nih thu leh kei hi an vawikhat hlawhtlinna ka nih thu min hrilh a, tichuan Sawrkar hnuaiah tuma hriat lohin ka thawk ta reng a, kum 3 ka thawh hnuah thla thum chawlh hmangin ka rawn haw a, a bak zawng chu i hriat vek tawh kha a ti chuai raih a. Eng vanga mi that nge a nih tih ka zawh chuan an hmuh loh tur an hmuh avang a nih thu leh keipawh ka hmu tih hria sela chu min that ve tur thu a sawi a, mahse chu erawh a thleng lo hlauh a. Tichuan, Sawrkar laipui hnuaia hna thawk lo man ngawt chu a fuh lohna a awm avang chuan ka rual a Aizawl a rawn chhuk ve tur leh a rang thei ang ber a a hna thawhna lamah chhuk turin thu kan ti tlu a, ka haw san ta a. A tukah chuan Aizawl kan pan nghal a, tualthattu chu Sapui a nih thu puangzar nghal a ni a, tichuan Aizawlah pawh awm rei lo chuan a hnathawhna lam panin a liam thla nghal a. Engtinnge hun a hman tak zel tih leh hlim takin hringnun a hmang ang em tih chu ka ngaihtuahna luahtu ber a ni. Ka tan a parvul ta lo ngaihtuah rauh rauh chung chuan he thawnthu hi ka ziak ta malh malh a.
** Ka lehkhabu ziah mek a mi lak tawi a ni a, a thu in man fuh lo deuh leh ulh deuh a awm nual ang, in hriatthiamna ka ngen e. VNT Fonts ka hman avangin ţ (tri) hi /angin a lang a min hriatthiamna ka ngen bawk a che u.**
