Hringnun
zinkawng hi!
- Tlanzova Darngawn
- Tlanzova Darngawn
He khawvelah hian tu mai pawh hi tap
chungin kan lo piang a, kan khualzin kawngte zawh chhoin, lungngaihna leh
buaina, hlimna tam takte kan zinkawngah kan tawng chho zel a, a tawpah chuan
zinkawng zawh zovin kan kumhlun ram tur kan pan dawn a ni. Ni e, he khawvelah
hian rei cham tur kan ni lo tih chu kan inhre vek awm e. Reilote rawn lang a,
liam leh mai thin kan ni a. Hlobet par ang maia zinglama par a, tlai lama uai
leh mai thin kan ni.
He hringnun kan hman mek hi kan khualzinna kawng a ni a,
he khualzinna kawngah hian thenkhat chuan hlim reng tur emaw, nuam reng tur
emaw kan inti thin. Hlimna leh lawmna chauh tawng tura kan inngaihlaiin,
harsatna leh manganna a lo thlen hian lungngaiin kan indawm kun a, hrethiam
lovin kan buai leh fo thin. He hringnun kawng kan zawh chhoh meknaah hian
lungngaihna, buaina leh harsanate pawh kan tawng chho dawn a ni tih kan hriat a
tul hle. Hetiang kawngah hian he khualzin kawng zawh tute hian kan hriatthiam a
ngai a, harsatna a lo thlen pawhin lungngaia in dawm kun mai lo in huaisen
takin kan hmachhawn tur a ni. Harsatna leh manganna a
lo thlenin hrethiam lo in kan indawm kun a, engtikah mah par chhuak leh tawh lo
tura inngaihna neiin, nun hial tihtawp duhna kan lo neih phah thinna hi he
hringnun kan hman mek kan hriatthiam lo thin vang a ni.
He khawvel hi kan duh dan ang
diak diak a inher tur leh hlimna min thlen reng turah ngaiin, thalai tam tak
chuan kan khualzin kawng hi kan zawh a. Mahni duhdan leh nuam tih zawng hmangin
kan hringnun kawng kan zawh a; min siamtu hre chang lo lekin khawvel par kan
chen a “It’s my life” te kan han ti vel thin hi chu kan in enchian a ngai hle
in ka hria. He hringnun kawng kan zawh mek hi engtikah nge kan zawh tawp dawn
kan hre si lo. He khawvelah mikhual leh
khualzin kan nih avangin Khual tha nge kan nih a khual chhia tih hi kan in zawn
nawn fo a tul awm e.
Mi tamtak chuan vanduaina leh
harsatna an tawh changin ‘Kei chu ka vanduai bik, chhiatna hlir ka chungah a
thleng bik’ tiin an vui thin, hringnun kawng an zawh mek an hriatthiam loh vang
a ni. Min siamtu hian tumah vanduai bik turin min siam lo a ni tih hi hre thar
leh theuh ila a duhawm hle. He khawvel, kan khualzinna hian kan duh dan ang
anga min her pui kan beisei lai hian, he khawvel zau zia hi ngaihtuah ila. He
khawvelah hian hlim reng tura kan indah lai hian he khawvela mihring dang
tamzia hi i hre thar leh ila. Hun tha leh hlimawm kan tana a lo inherchhuah hun
hi nghak thiam hram ang u. Tin, min siamtu duhdan a nun hman hi kan tihtur
pawimawh ber a ni a, mahni duhdan ang ang a kan tal mai mai chuan he hringnun
kawng kan zawh tawp hunah kan chan a chhe lutuk dah ang e.
“Hringnun
hi lehkhabu ang a ni a, lungngaihna leh tahna phek kan chhir thleng a nih
pawhin chawl loin kan chhiar reng tur a ni; engtikah nge hlimna leh lawmna phek
kan chhiar thlen dawn kan hre si lo”.
